Премиерот Христијан Мицкоски денеска соопшти дека се забележува ново нарушување во македонско-бугарските односи, што дополнително ја усложнува веќе чувствителната состојба во процесот на европските интеграции.
На новинарско прашање за очекувањата во однос на дијалогот со Бугарија, премиерот изјави дека сигналите што пристигнуваат од Софија не даваат основа за оптимизам, наведувајќи дека во последниот период се забележува заострување на ставовите.
Како пример за влошување на комуникацијата, Мицкоски посочи објава на дипломатска нота поврзана со патување на членови на неговото семејство во Пампорово.
„Сигналите што доаѓаат оттаму не ме прават оптимист. Напротив, состојбата се радикализира. Станува збор за невообичаена пракса во дипломатијата“, изјави Мицкоски, додавајќи дека за случајот ги информирал партнерите во НАТО.
Тој оцени дека станува збор за потег кој не придонесува за подобрување на односите и дека фокусот треба да остане на реформската агенда и економските приоритети.
Во однос на дипломатската нота, премиерот посочи дека таа содржи детали поврзани со патување на членови на неговото семејство, што според него претставува несоодветна пракса во дипломатската комуникација.
Во меѓувреме, европските интеграции на Северна Македонија остануваат условени со исполнување на обврските од преговарачката рамка, вклучително и уставните измени, додека процесот со ЕУ продолжува во поширок регионален контекст.
МОЖЕБИ ЌЕ ВЕ ИНТЕРЕСИРА:
