Јавниот транспорт во Скопје ќе се реши единствено ако се комбинираат проектите за „Градски воз“, набавка на нови еколошки автобуси и проектот за БРТ, смета вицепремиерот и министер за транспорт, Александар Николоски.
„За да го решиме транспортот треба да се направат трите работи паралелно. Едно е возобновувањето на возниот парк на ЈСП со електрични автобуси за што веќе работиме. Второто е решавање на приградските населби со центарот, а тоа е градски воз и третото е решавање на урбаниот дел со поекономичен тарнспорт кој јас фигуративно го нарекував трамвај за да им е сликовите на граѓаните, а тоа е трамвај без шини. И трите работи мора да ги споиме и да има синергија меѓу нив. Било која од трите да функционира сама ќе го имаме ова што сега го имаме“, истакна Николоски во гостувањето на „Топ тема“ на телевизија Телма.
Во однос на проектот „Градски воз“ тој потенцираше дека истиот веќе се реализира со засилена динамика на првата линија од Зелениково преку Драчево до Нова железничка станица.
„Проектот е голем, презначаен за Скопје кој ќе остави длабока трага за да биде манипулиран за изборната кампања и затоа промоцијата беше после изборите. Три линии имаме, ние почнавме да ја работиме првата линија која оди од Зелениково преку Драчево, Лисиче, Кисела Вода, Аеродром и Нова железничка станица, таа е 25 км. Втората која ќе почнеме да ја работиме напролет оди од Миладиновце, Илинден, Маџари и Нова железничка и третата од Нова железничка, Скопје Север, Ѓорче Петров и завршува во Волково односно во Радуша. И тоа е во принцип инфраструктура која Скопје ја има и која што децении наназад е запуштена и не користена. Пример, дрвените прагови коишто ги менуваме во моментов кај Драчево се поставени помеѓу 1963 и 1969 година. Над 60 години воопшто ништо не се работело таму“, рече вицепремиерот Николоски.
Тој најави дека ќе се направи бајпас околу Скопје, а со тоа дизел локомотиви и возови нема да влегуваат во градот за да се влијае врз заштитата на воздухот. Исто така, најави и дека ќе се набавуваат и нови возови, а набавката се планира да започне на две години пред да се заврши брзата пруга.
