Во текот на реновирањето на винарската визба, австрискиот производител на вино открил коски од мамут, за кои се проценува дека се стари меѓу 30.000 и 40.000 години, пишува во четвртокот германската агенција dpa.
Винарот го пријавил своето откритие до Австриската федерална канцеларија за споменици, по што археолозите од Австриската академија на науките (ÖAW) започнале со ископувања во средината на мај.
Коските од мамути се пронајдени во австрискиот град Гобелсбург, северозападно од Виена.
Според ÖAW, остатоците од мамут претставуваат „најзначајното откритие на овој вид во повеќе од 100 години“. Археолозите пронајдоа неколку слоеви на остатоци, што сугерира дека тие веројатно припаѓаат на најмалку три мамути кои живееле во леденото доба.
„Ваков огромен слој на коска од мамут е редок“, вели археологот Хана Пароу-Сучон.
Истражувачите рекоа дека локацијата можеби служела како место каде луѓето од камено доба ги гонеле огромните животни во стапици за да ги убијат подоцна. Тие се надеваат дека ќе откријат нови индиции за тоа како луѓето организирале лов на животни во античко време.
Според ÖAW, пред 150 години, исто така, во винарска визба во Гобелсбург, бил откриен густ слој од коски заедно со културни слоеви со артефакти, накит, фосили и јаглен.
Откако археолозите ќе го испитаат новото откритие, коските ќе му бидат предадени на Природонаучниот музеј во Виена за реставрација.
МОЖЕБИ ЌЕ ВЕ ИНТЕРЕСИРА:
