Фудбалот на Балканот изгуби едно познато и почитувано име. Младен Жижовиќ, тренерот на Раднички Крагуевац и поранешен стратег на Шкупи, почина денеска во Лучани, за време на натпреварот од српското првенство меѓу Младост и Раднички.
Жижовиќ се сруши на теренот во 22-та минута, по што беше веднаш пренесен со брза помош, но лекарите не успеаја да го реанимираат. Веста ја потресе целата спортска јавност во регионот.
Роден во Рогатица на 27 декември 1980 година, Жижовиќ зад себе остави богата играчка и тренерска кариера. Настапуваше за Младост Рогатица, Радник Бијелина и Зрињски Мостар, а во 2008 година двапати го облече дресот на репрезентацијата на Босна и Херцеговина.
По завршувањето на играчката кариера, со истата страст се посвети на тренерската работа. Ги водеше Радник Бијелина, Зрињски Мостар, Шкупи, Борац Бања Лука, а последно беше на клупата на Раднички Крагуевац, каде што настапува и македонскиот репрезентативец Лука Станковски.
Со својот мирен карактер, професионализам и љубов кон фудбалот, Младен Жижовиќ ќе остане запаметен како човек кој го живееше спортот со целото срце.
