Србија има рок од седум дена да најде решение за Нафтената индустрија на Србија (НИС), која според условите на САД треба да не остане во мнозинска руска сопственост, истакна денеска претседателот Александар Вучиќ на отворената седница на Владата. Тој додаде дека национализацијата би била последната опција, доколку не се постигне друг договор.
Вучиќ објасни дека руските партнери веќе преговараат за продажба на уделот во НИС со азиски и европски компании, и дека Србија ќе се согласи на каков било фер договор. Претседателот потенцира дека санкциите против НИС се на сила веќе 37 дена, но земјата добро се подготвила и нема причина за паника. „Имаме доволно резерви на гориво, вклучително и 25.000 тони дизел во воени резерви. Сепак, мораме да бидеме подготвени да обезбедиме употреба на дизел за цивилни потреби ако е потребно, а војската ќе излезе во пресрет на народот“, рече Вучиќ.
Тој нагласи и дека Владата треба да подготви ребаланс на буџетот за оваа година, во случај да се потребни дополнителни средства за НИС или за набавка на гориво. Претседателката на Парламентот, Ана Брнабиќ, потврди дека собранието ќе усвои ребаланс по итна постапка доколку тоа биде потребно.
Министерката за рударство и енергетика, Дубравка Ѓедовиќ Хандановиќ, истакна дека Србија добила јасна порака од САД: во наредните три месеци руската сопственост на НИС мора трајно да се промени. Таа додаде дека е подготвена да поднесе оставка бидејќи „немаме живот без рафинеријата“, а на тоа се согласува и министерот за финансии Синиша Мали.
„Едноставно немаме избор. Оваа ситуација со НИС загрозува сè – нашиот економски раст, стабилност и кредитен рејтинг“, изјави Мали, нагласувајќи ја сериозноста на моментот за Србија.
МОЖЕБИ ЌЕ ВЕ ИНТЕРЕСИРА:
