По темелна истрага спроведена од полициски службеници од СВР Скопје, односно Единицата за насилен криминал и Одделението за крвни деликти, под координација на јавен обвинител од Основното јавно обвинителство Скопје, целосно е расчистен крвавиот инцидент што се случи за време на новогодишната ноќ во Старата скопска чаршија.
Министерството за внатрешни работи поднесе кривична пријава против М.Т. (25), државјанин на Република Турција со престојувалиште во Тетово, за кого постои основано сомнение дека сторил кривично дело убиство од член 123 од Кривичниот законик, како и убиство во обид, согласно истиот член во врска со член 19.
Според истрагата, осомничениот во текот на ноќта започнал вербална расправија со А.М.Д. (22) и Ч.Е. (23), двајцата од Турција, во кафе-бар во чаршијата. По конфликтот, оштетените заедно со уште неколку лица се упатиле кон плоштадот, но откако не успеале да пронајдат такси, се вратиле назад и повторно поминале во близина на истиот локал.
При повторната средба, расправијата ескалирала, по што М.Т. извадил нож и му задал четири убодни рани во пределот на градниот кош и срцето на А.М.Д., кој починал на самото место. Со уште еден убод му нанел тешка телесна повреда на Ч.Е., со намера да го лиши од живот, по што избегал од местото на настанот.
Во рамки на постапката, по наредба на јавен обвинител била извршена обдукција на починатиот, биле подигнати материјални траги за вештачење, реализирани разговори со повеќе лица и анализирани снимки од видео надзор, преку кои е утврден идентитетот на осомничениот.
По преземени оперативно-тактички мерки, полицијата утврдила дека осомничениот се наоѓа на територијата на Косово, каде што е лишен од слобода од страна на тамошните безбедносни органи.
МОЖЕБИ ЌЕ ВЕ ИНТЕРЕСИРА:
