Најмалку 39 лица го загубија животот, а 152 се повредени откако брз воз излета од шините и се судри со друг воз кој се движел од спротивната насока во јужна Шпанија, објави државната телевизија RTVE, повикувајќи се на полициски извори.
Тешката железничка несреќа се случила во неделата во 19:45 часот, во близина на местото Адамуз, во покраината Кордоба, на околу 360 километри јужно од Мадрид.
Поради несреќата, во понеделникот беше прекинат сообраќајот на повеќе од 200 возови меѓу Мадрид и јужниот регион Андалузија, вклучително и линиите кон големите градови Кордоба, Севиља и Гранада, соопшти телевизијата.
Шпанскиот премиер Педро Санчез ги откажа сите планирани активности за понеделник, информираа од неговиот кабинет.
Снимки објавени на социјалните мрежи покажуваат драматични сцени од местото на несреќата, каде што спасувачките екипи извлекуваат патници од превртените вагони. Дел од повредените излегувале низ скршените прозорци, додека други биле пренесувани на носилки.
Причината за несреќата сè уште не е утврдена. Шпанскиот министер за транспорт Оскар Пуенте изјави дека истрагата е во тек, на прес-конференција одржана на железничката станица Аточа во Мадрид.
МОЖЕБИ ЌЕ ВЕ ИНТЕРЕСИРА:
