Со изградбата на експресниот пат Страцин – Крива Паланка, реконструкцијата на обиколницата во Крива Паланка и модернизацијата на граничниот премин Деве Баир, целосно се развива источниот крак на Коридор 8, истакна вицепремиерот и министер за транспорт Александар Николоски, кој заедно со премиерот Христијан Мицкоски и директорот на ЈП за државни патишта Коце Трајановски ја пуштија во употреба реконструираната обиколница во Крива Паланка.
Проектот, вреден 1,2 милиони евра, е дел од инфраструктурните активности на Коридор 8 и опфаќа целосна рехабилитација на делница долга 4,5 километри.
Николоски нагласи дека станува збор за проект реализиран во предвидениот рок и пример за одговорна реализација на капитални инвестиции. Според него, обиколницата не претставува само локално сообраќајно решение, туку важна врска со Република Бугарија и значаен сегмент од Коридор 8. Тој потсети дека минатиот јануари беше пуштен во употреба експресниот пат Крива Паланка – Страцин, а во тек е и модернизацијата и проширувањето на граничниот премин Деве Баир.
Првата фаза од реконструкцијата на граничниот премин, која опфаќа обнова на постојните објекти, се очекува да заврши до јуни, по што ќе следува втората фаза со проширување на капацитетите. Со модернизиран премин, нова обиколница и експресен пат, според Николоски, значително се унапредува источниот дел од Коридор 8.
Тој додаде дека во соработка со Европската Унија, во рамки на Планот за раст, се разгледуваат решенија за модернизација на патниот правец Страцин – Романовце, односно до Куманово. Во однос на железничкото поврзување, Николоски информира дека започнати се интензивни активности за железничка врска меѓу Крива Паланка, Скопје и Софија, вклучително и договорот со Бугарија за изградба на прекуграничен тунел.
И покрај наследените проблеми со изведувачот на втората фаза, работите напредуваат, а целта е Крива Паланка да се поврзе со Бељаковце и да се воспостави редовна железничка линија до Скопје.
Премиерот Христијан Мицкоски изјави дека во наредниот период во источниот регион се очекуваат инвестиции вредни неколку стотици милиони евра, особено во железничката инфраструктура, граничниот премин и патната мрежа. Тој оцени дека ваквите вложувања ќе придонесат за економски развој и ќе ги мотивираат граѓаните да останат или да се вратат во регионот.
Директорот на ЈП за државни патишта Коце Трајановски посочи дека реконструираната обиколница е изведена согласно сите современи стандарди.
МОЖЕБИ ЌЕ ВЕ ИНТЕРЕСИРА:
