Македонската православна црква – Охридска архиепископија направи кадровски промени во составот на Светиот архијерејски синод, откако на последната седница беше утврден новиот работен тим што ќе раководи со оперативните активности на Синодот.
Според одлуката, митрополитот Наум е избран за нов член на работниот состав на Синодот, на местото на владиката Петар, чиј мандат завршил. За заменик-член е именуван митрополитот Пимен.
Со овие измени, оперативниот состав на Светиот архијерејски синод во наредниот период ќе го сочинуваат архиепископот Стефан, заедно со митрополитите Наум и Агатангел.
На седницата била формирана и посебна комисија која ќе ја анализира материјално-финансиската состојба во новоформираните епархии. Според информациите, засега не биле донесени конечни одлуки поврзани со прашањата околу поранешните членови на ПОА.
Во официјалното соопштение не се наведува дали на седницата било разговарано за барањата на владиката Петар.
Синодот ги разгледал и усвоил годишните извештаи од епархиите во земјата и дијаспората, при што посебно внимание било посветено на демографските состојби кај македонското православно население.
Меѓу позначајните одлуки е и формирањето Фонд за поддршка на семејства со повеќе деца, кој ќе функционира во рамки на црковните социјални активности.
МОЖЕБИ ЌЕ ВЕ ИНТЕРЕСИРА:
