Во текот на оваа недела во Македонија се регистрирани седум нови случаи на инфекција со вирусот Западен Нил, соопшти Министерството за здравство. Сите новозаболени лица се од Скопскиот регион.
Два случаи се евидентирани во општините Кисела Вода и Гази Баба, а по еден случај има во Илинден, Бутел и Аеродром. Заболените се на возраст од 60 до 84 години и сите се хоспитализирани.
Од Министерството информираат дека на Универзитетската клиника за инфективни болести и фебрилни состојби моментално се лекуваат 16 пациенти. Кај 15 лица инфекцијата е лабораториски потврдена, додека за еден пациент сè уште се очекуваат резултатите.
Тројца пациенти се во критична состојба и се наоѓаат на механичка поддршка на дишењето. Станува збор главно за повозрасни лица со придружни здравствени проблеми, додека останатите пациенти се во стабилна состојба и примаат соодветна терапија.
Заклучно со последните податоци, во земјава се регистрирани вкупно 20 случаи на Западен Нил. Првиот случај годинава бил пријавен на 15 мај во Велес.
Здравствените власти повторно апелираат граѓаните да преземат мерки за заштита од комарци, бидејќи тие се главни преносители на вирусот. Се препорачува избегнување престој на отворено во раните утрински и вечерните часови, користење репеленти, поставување заштитни мрежи и редовно отстранување на застојана вода од дворовите и терасите.
МОЖЕБИ ЌЕ ВЕ ИНТЕРЕСИРА:
