Високите дози на витамин Ц би можеле да обезбедат значителна заштита на белите дробови од штетните ефекти на ситните честички во воздухот познати како PM2.5, покажува ново истражување. Овие загадувачи, именувани според нивната микроскопска големина, се поврзуваат со сериозни здравствени проблеми, меѓу кои астма и рак на белите дробови, а резултатите од студијата нудат надеж за едноставно и достапно превентивно решение, пренесува ScienceAlert.
Истражувањето е спроведено од научници од Технолошки универзитет во Сиднеј, кои тестирале високи дози на витамин Ц врз глувци и лабораториски одгледувани човечки ткива. Резултатите покажале дека витаминот значително ги намалува клеточните оштетувања предизвикани од загадувањето на воздухот. Поточно, витамин Ц го спречил губењето на митохондриите – енергетските центри на клетките, го ублажил воспалението и го намалил оштетувањето предизвикано од оксидативен стрес.
Како силен антиоксиданс, витаминот Ц бил логичен избор за вакво истражување. Авторите наведуваат дека дополнувањето со витамин Ц било ефикасно во намалувањето на негативните ефекти од изложеност на ниски нивоа на PM2.5, што може да биде препорачливо за лица со зголемен ризик.
Сепак, научниците предупредуваат на потребата од внимателност. Иако резултатите се охрабрувачки, потребни се дополнителни клинички истражувања за да се утврди дали истиот заштитен ефект важи и кај луѓето во реални услови. Во лабораториските услови, нивото на загадување и дозите на витамин Ц биле строго контролирани, што не секогаш одговара на секојдневната изложеност во реалниот свет.
Молекуларниот биолог Брајан Оливер од универзитетот во Сиднеј наведува дека земањето на највисоката дозволена доза на витамин Ц потенцијално може да помогне, но препорачува консултација со матичен лекар за да се избегне несакано предозирање или внес на несоодветни додатоци.
Честичките PM2.5 најчесто потекнуваат од електрани, моторни возила, авиони, горење дрва, шумски пожари, земјоделско палење, вулкански ерупции и прашни бури. Истражувањето дополнително потврдува дека дури и ниските нивоа на загадување можат да предизвикаат сериозни оштетувања на клеточно ниво, при што нивоата на кои биле изложени глувците одговараат на оние измерени во голем дел од развиениот свет.
Иако долгорочното решение останува подобрување на квалитетот на воздухот, научниците сметаат дека суплементацијата со витамин Ц може да биде дополнителен начин за заштита на здравјето. Истражувањето е објавено во научното списание Environment International
МОЖЕБИ ЌЕ ВЕ ИНТЕРЕСИРА:
