Шеесет и деветгодишен пациент починал од компликации предизвикани од сезонски грип на Клиника за инфективни болести во Скопје. Директорот на клиниката, Фадил Цана, информира дека пациентот бил хоспитализиран во тешка здравствена состојба и со повеќе коморбидитети.
Станува збор за втор смртен случај поврзан со грип во земјава годинава.
„Пациентот беше примен со развиена масивна пневмонија и акутен респираторен дистрес синдром. Не бил вакциниран против сезонски грип, иако припаѓал на ризична група за која вакцинацијата е препорачана“, изјави Цана.
Во моментов, на Инфективната клиника се хоспитализирани околу 30 пациенти со грип, од кои еден е во потешка состојба и е приклучен на механичка поддршка. Дневно се вршат приближно 100 прегледи на пациенти со симптоми на грип, при што најголемиот дел од нив се третираат амбулантски.
Според официјалните податоци, во периодот од 5 до 11 јануари во Македонија се евидентирани 2.322 случаи на заболени од грип и заболувања слични на грип, што е зголемување од 34,6 проценти во однос на претходната недела, кога биле регистрирани 1.725 случаи.
Во текот на сезоната 2025/26, вкупниот број на пријавени случаи изнесува 6.147. Во споредба со истиот период од минатата сезона, бројот е зголемен за 2,6 пати, додека во однос на просекот од последните 15 сезони е забележан пораст од 27 проценти.
Заклучно со втората недела од јануари, во земјава се вакцинирани 79.017 лица со бесплатна или комерцијална вакцина против сезонски грип.
МОЖЕБИ ЌЕ ВЕ ИНТЕРЕСИРА:
