Секојдневниот кардио тренинг може да донесе бројни здравствени придобивки, но експертите предупредуваат дека ефектите се позитивни само доколку се комбинираат со соодветен одмор, правилна исхрана и доволен опоравок, пренесува Health.
Кардио-вежбите како трчање, возење велосипед или брзо одење го забрзуваат пулсот и дишењето, а со текот на времето предизвикуваат длабоки промени во организмот. Редовната физичка активност може да го зголеми бројот на митохондрии во клетките, што резултира со поголемо производство на енергија, подобра издржливост и побрз опоравок.
Покрај тоа, кардиото го зајакнува срцевиот мускул и ја подобрува циркулацијата, со што се намалува ризикот од висок крвен притисок, покачен холестерол, срцев и мозочен удар. Истовремено, се подобрува и функцијата на белите дробови, кои поефикасно ги снабдуваат мускулите со кислород, овозможувајќи подолго вежбање со помал напор.
Редовниот кардио тренинг има позитивно влијание и врз менталното здравје, бидејќи го поттикнува лачењето на хормоните на добро расположение и може да помогне во намалување на стресот, анксиозноста и депресивните состојби. Дополнително, физичката активност придонесува за подобра регулација на шеќерот во крвта, што долгорочно може да помогне во превенција на дијабетес тип 2 и други метаболички нарушувања.
Сепак, стручњаците предупредуваат дека секојдневното кардио без доволен одмор може да доведе до претренираност, со симптоми како хроничен замор, нарушен сон, пад на физичките перформанси и зголемен ризик од повреди. Кај жените постои и поголем ризик од релативен енергетски дефицит, состојба при која внесот на калории не ги задоволува потребите на организмот.
Затоа, клучот за здрав и ефикасен тренинг е рамнотежата. Експертите препорачуваат поголемиот дел од кардио активностите да бидат со лесен интензитет, умерен тренинг да се практикува повремено, а интензивните вежби да се ограничат. Деновите за одмор се подеднакво важни, бидејќи му овозможуваат на телото целосно да се опорави и да постигне долгорочни здравствени резултати.
МОЖЕБИ ЌЕ ВЕ ИНТЕРЕСИРА:
