Најмалку шест лица го загубија животот додека силниот студ, снегот и мразот продолжуваат да создаваат сериозни проблеми низ повеќе делови од Европа.
Во југозападна Франција, во регионот Ланд, властите соопштија дека три лица загинале, а 15 се повредени во серија сообраќајни несреќи. Дополнително, уште две лица ги загубиле животите во несреќи во и околу Париз. Еден возач починал во болница откако неговото возило излетало во реката Марна, додека друг загинал во судир со тешко товарно возило на источната периферија на градот.
Во Сараево, една жена почина откако гранка од дрво, натежната од снег, паднала врз неа.
Лошите временски услови предизвикаа сериозни нарушувања и во воздушниот сообраќај. Голем број летови беа откажани на аеродромите „Роаси-Шарл де Гол“ и „Орли“ во Париз, за да им се овозможи на службите да ги исчистат пистите и да извршат одмрзнување на авионите. Слична состојба е регистрирана и на аеродромот „Схипхол“ во Амстердам, каде стотици летови беа откажани, а железничкиот сообраќај дополнително беше нарушен поради прекин на ИТ-систем.
Екстремно ниски температури го зафатија и поголемиот дел од Германија, каде на некои места термометрите паднаа под -10 степени Целзиусови. Метеоролозите предупредуваат на нов снежен бран во наредните денови.
Во Обединето Кралство се измерени температури до -12,5 степени, што доведе до затворање на стотици училишта и сериозни проблеми во патниот, железничкиот и воздушниот сообраќај.
Снежните врнежи и дождовите не ја одминаа ниту Италија. Во Рим, реката Тибар се излеа по обилните дождови, а градските власти воведоа ограничувања за пристап до паркови и ризични подрачја поради опасност од паѓање дрвја.
Балканските земји исто така се соочуваат со сериозни последици од лошото време. Обилни врнежи и снег предизвикаа проблеми во сообраќајот, поплави и прекини во снабдувањето со струја и вода, додека во делови од Србија беа воведени итни мерки.
Силен ветер и бурно море го погодија и јадранскиот брег во Хрватска и Црна Гора, дополнително отежнувајќи ја состојбата во регионот.
МОЖЕБИ ЌЕ ВЕ ИНТЕРЕСИРА:
