На Универзитетот Скопје, денес, на 2 октомври, 2023 година, се одржа Првиот свечен академски час, со што беше одбележан почетокот на наставата за студентите запишани на прв циклус студии во учебната 2023-2024година.
Во амфитеатарот на Универзитетот, на студентите со пригоден говор им се обрати ректорот проф. д-р Аце Миленковски. Тој го претстави својот тим – проректорите, деканите, професорите и административниот кадар на Универзитетот и од името на сите свои соработници им посака топло добре дојде на новите студенти.
Во своето обраќање, проф. д-р Аце Миленковски им порача на студентите дека трпението е тоа што го прави човекот мудар и моќен, затоа што тоа значи владеење со себе во кој било миг што e предизвик, а со тоа и можност за индивидуален раст и развој. Tој ги потсети идните академски граѓани на Македонија дека секоја цивилизација од антиката до денеска се потпира на два клучни столба – образование и здравство, олицетворени во македонскиот културен идентитет во ликовите на светите Климент и Наум, според кои е и именуван амфитеатарот на Универзитетот. На овој начин, целокупниот академски кадар на Универзитетот Скопје секојдневно се потсетува на својата примарна улога – да гради образовани и здрави идни лидери на општествените промени во Македонија.
Ректорот проф. д-р Аце Миленковски во својот говор зборуваше и за методологијата на студирање по која се издвојува Универзитетот Скопје, а која се базира на принципот на мерливост на знаењето. Универзитетот Скопје доследно го спроведува и системот на трансфер на кредит според Болоњската декларација (ЕКТС-систем).
По завршувањето на свечениот академски час, студентите од секој факултет имаа одделни средби со деканите, на кои беа информирани за идните активности во академската 2023-2024 година, примената на дигиталната технологија во процесот на студирање, наставните програми, распоредот на настава, како и за користењето на Е-индекс, Е-студент и Е-библиотека.
Тимот на Универзитетот Скопје уште еднаш им посакува успешна академска година на своите нови колеги!
