На паркингот на булеварот „АСНОМ“ во скопската населба Ново Лисиче се оштетени најмалку 34 патнички возила, а вкупната материјална штета се проценува на околу 11.000 евра, информираат од Министерство за внатрешни работи. Непознати сторители извршиле масовен вандализам врз паркираните автомобили, при што биле испукани гуми, искршени ретровизори и оштетени бандаши.
Според пријавата, инцидентот се случил во периодот од 23:00 часот на 27 декември до 09:00 часот на 28 декември 2025 година. На местото на настанот увид извршила екипа на СВР Скопје, а за случајот бил известен и надлежен јавен обвинител.
Од МВР соопштуваат дека веќе се преземаат мерки за пронаоѓање на сторителите и целосно расчистување на случајот, при што се проверуваат и снимките од околните камери за видео надзор. Додека надлежните органи ја сумираат штетата, кај жителите од овој дел на градот остануваат загриженоста и прашањето кој и со каков мотив би се одлучил на ваков чин на уништување на приватен имот.
МОЖЕБИ ЌЕ ВЕ ИНТЕРЕСИРА:
