Здравствените власти во Индија воведоа вонредни мерки по појавата на ново жариште на вирусот Нипа – ретка, но исклучително опасна вирусна инфекција што се пренесува од животни на луѓе и има исклучително висока стапка на смртност. Според официјални и медиумски извештаи, досега се потврдени пет случаи на зараза во поширокиот регион на Калкута, додека речиси сто лица се ставени под медицински надзор поради потенцијален контакт со инфицирани лица.
Вирусот Нипа е на листата на приоритетни патогени на Светската здравствена организација, поради ризикот од епидемиско ширење и тешката клиничка слика. Првпат бил регистриран во 1999 година во Малезија и Сингапур, а во изминатите години повремено предизвикува епидемии во Јужна и Источна Азија. Индија, особено државата Керала, со години се соочува со повторливи појави на овој вирус.
Според досегашните сознанија, актуелната епидемија започнала во приватната мултиспецијалистичка болница „Нарајана“ во Барасат, населено место лоцирано околу 25 километри северно од Калкута. Првите заразени биле здравствени работници – медицинска сестра и лабораториски техничар. Состојбата на медицинската сестра е критична и таа се наоѓа во кома. Во наредните денови биле потврдени уште три случаи, меѓу кои и еден лекар.
Инфекцијата најчесто започнува со симптоми слични на грип, како покачена температура, главоболка, болки во мускулите и повраќање, но може брзо да напредува во тешки компликации, вклучително и воспаление на белите дробови или мозокот. Во најтешките случаи, состојбата на пациентите може нагло да се влоши во рок од еден до два дена. Во моментов не постои специфична терапија, ниту одобрена вакцина против вирусот Нипа.
Преносот на вирусот најчесто се поврзува со контаминирана храна, особено суров палмин сок кој може да биде загаден од овошни лилјаци – природниот резервоар на вирусот. Забележани се и случаи на пренос од човек на човек, најчесто во болнички услови, како и директен контакт со заразени животни.
Индиските здравствени служби спроведуваат масовно следење на контактите. Околу 180 лица се тестирани, а дваесет лица со висок ризик се ставени во строг карантин. Целта е навремено изолирање на случаите и спречување на понатамошно ширење на заразата.
Епидемиолозите предупредуваат дека вирусот Нипа претставува сериозна закана на глобално ниво, токму поради комбинацијата од висока смртност и можност за меѓучовечко пренесување. Со зголемениот контакт меѓу луѓето и дивите животни, ризикот од нови епидемии останува висок.
Светската здравствена организација и други меѓународни тела со години апелираат за забрзан развој на вакцини и терапии. Иако неколку вакцинални кандидати се во клиничка фаза, засега нема решение за широка примена.
Додека властите се обидуваат да ја стават состојбата под контрола, граѓаните се повикуваат на зголемена претпазливост, избегнување контакт со лилјаци, неконсумирање суров палмин сок и ограничување на движењето во подрачјата каде се пријавени случаи. Загриженоста од пошироко ширење и натаму останува, бидејќи вирусот Нипа се смета за еден од најопасните патогени без ефикасен лек.
МОЖЕБИ ЌЕ ВЕ ИНТЕРЕСИРА:
