Украинската влада најави нови мерки за поддршка на граѓаните во услови на оштетен енергетски систем поради руските напади. Претседателот Володимир Зеленски соопшти дека државата ќе им помогне на домаќинствата и станбените заедници при набавка на генератори и други извори на автономно напојување.
Одлуката, како што изјави Зеленски во своето вечерно обраќање, е донесена по консултации со премиерката Јулија Свириденко. Целта е купувањето алтернативни извори на електрична енергија да стане подостапно за здруженијата на сопственици на станови и за сопствениците на семејни куќи.
Во рамки на постоечка бизнис-програма, досега се поднесени околу 20.000 барања за субвенции за одржување и поправка на генератори. Дополнително, одобрени се бескаматни заеми во вредност од половина милијарда гривни, односно околу 11,6 милиони долари, за купување генератори. Според Зеленски, интересот за ваква поддршка веројатно ќе продолжи да расте.
Енергетската инфраструктура на Украина е сериозно оштетена по неколкуте бранови руски воздушни напади од почетокот на јануари. Поради тоа, градови како Киев и Харков се соочија со прекини на електричната енергија и греењето во период на силни студови. Во главниот град повеќе од 1.100 станбени објекти се очекува да останат без греење до пролет, додека дел од компаниите продолжуваат да работат со помош на дизел-генератори.
Државната енергетска компанија „Укренерго“ најави дека и денеска ќе има повеќечасовни прекини на струја низ различни делови од земјата.
МОЖЕБИ ЌЕ ВЕ ИНТЕРЕСИРА:
