Синиша Каран положи заклетва во Народното собрание на Република Српска на 17 февруари, со што и официјално ја презеде функцијата претседател на овој ентитет во Босна и Херцеговина. Неговиот избор беше потврден на 13 февруари од Централна изборна комисија на Босна и Херцеговина, откако победи на предвремените избори како кандидат на Сојуз на независни социјалдемократи, партијата предводена од Милорад Додик.
Мандатот на Каран ќе трае до општите избори во БиХ, закажани за октомври оваа година. Тој беше избран на предвремените избори одржани на 23 ноември 2024 година, но преземањето на функцијата беше одложено поради повторување на гласањето на 136 избирачки места поради утврдени изборни злоупотреби. По повтореното гласање на 8 февруари, Каран освои 50,5 проценти од гласовите, додека неговиот противкандидат Бранко Блануша од Српска демократска партија доби 48,1 процент.
Предвремените избори беа распишани откако на Милорад Додик му беше одземен претседателскиот мандат во август 2025 година, по пресуда за непочитување на одлуките на Високиот претставник. Во меѓувреме, функцијата вршител на должноста претседател ја извршуваше Ана Тришиќ Бабиќ, долгогодишна советничка на Додик.
Каран има 63 години и е доктор по правни науки од Бања Лука. Во последните години ја извршуваше функцијата министер за внатрешни работи на Република Српска, а поголемиот дел од својата професионална кариера го поминал во полицијата.
МОЖЕБИ ЌЕ ВЕ ИНТЕРЕСИРА:
