Наполи со победа ја отвори 28. рунда во Серија А, откако на домашен терен го совлада Торино со 2-1. Во триумфот на тимот од Неапол се истакна и македонскиот репрезентативец Елиф Елмас, кој го постигна својот прв гол оваа сезона во италијанското првенство.
Домашниот тим уште од стартот ја презеде иницијативата и со голем посед на топката постојано вршеше притисок врз одбраната на гостите. Наполи поведе во седмата минута, кога Алисон Сантос најдобро се снајде во шеснаесетникот и ја испрати топката зад грбот на голманот на Торино за водство од 1-0.
По раниот гол, наполитанците продолжија со офанзивната игра и создадоа уште неколку опасни ситуации. Најблиску до втор погодок беше Расмус Хојлунд, чиј удар од левата страна на шеснаесетникот заврши покрај стативата. Торино се обидуваше да возврати преку брзи контранапади, но ретко успеваше да создаде посериозна шанса.
Во 68. минута следуваше одличен потег на Елиф Елмас. По асистенцијата на Матео Политано, македонскиот репрезентативец со атрактивен волеј ја затресе мрежата на гостите и го зголеми водството на Наполи на 2-0.
Во составот на Наполи по подолга пауза се врати и искусниот Кевин Де Бројне, додека Торино до крајот успеа само да го ублажи поразот. Чезаре Касадеи во 87. минута го постигна почесниот погодок за конечни 2-1.
МОЖЕБИ ЌЕ ВЕ ИНТЕРЕСИРА:
