Претседателот на ВМРО-ДПМНЕ, Христијан Мицкоски, изјави дека во изминатиот период јавноста во Македонија била изложена на, како што вели, координирана опозициска кампања во која се тврдело дека државата тајно преговара за прифаќање мигранти од Обединетото Кралство. Според него, ваквите тврдења биле јавно демантирани од британската дипломатија, со што, како што нагласува, паѓа целата политичка конструкција што опозицијата се обидувала со месеци да ја наметне во јавноста.
Мицкоски истакна дека во јавниот простор постојано се пласирале информации дека зад стратешкото партнерство меѓу Македонија и Обединетото Кралство постои наводен таен договор за формирање центри за мигранти. Според него, ваквите тврдења биле повторувани на прес-конференции и во јавни настапи, при што се создавал впечаток дека Владата крие важни информации од граѓаните. Тој посочи дека дури биле најавувани и протести поради овие обвинувања.
Како што рече, вчера британскиот амбасадор во земјава, Метју Лосон, јавно изјавил дека таков договор не постои и дека никогаш не бил предмет на разговори. Според Мицкоски, со ова се потврдува дека обвинувањата биле без основа и дека не постоеле никакви преговори или планови за отворање центри за мигранти во државата.
Тој оцени дека со овој демант пропаѓа наративот што со месеци го пласирала опозицијата, предводена од Венко Филипче и СДСМ. Според Мицкоски, во јавноста биле изнесувани сериозни тврдења без документи, без официјални потврди и без докази, што, како што рече, имало за цел да создаде страв и паника меѓу граѓаните.
Мицкоски оцени дека ваквиот пристап не е изолиран случај, туку дел од, како што рече, повторлива политичка стратегија. Според него, најпрво се создава сензационалистичка приказна, потоа се поттикнува медиумска паника, а кога фактите ќе ја демантираат, темата се напушта без извинување или преземање одговорност.
Како пример, тој посочи дека слични ситуации имало и во други случаи, кога во јавноста се пласирале обвинувања дека институциите молчат за запленета дрога во Србија, а подоцна се покажало дека институциите работеле на случајот од самиот почеток. Исто така, посочи дека во јавноста се изнесувале и драматични проценки за пожарите во државата, како и тврдења дека нема средства за исплата на пензии, што, според него, подоцна не се покажало како точно.
Според Мицкоски, СДСМ денес функционира како политичка структура која, наместо со аргументи, се обидува да создаде атмосфера на политичка паника. Тој истакна дека иако постои политичка логика да не се прекинува противникот кога прави грешки, на државата ѝ е потребна сериозна и силна опозиција, а не, како што рече, опозиција оптоварена со политички и морални проблеми.
Мицкоски се осврна и на, како што рече, злоупотребата на трагичниот случај во општина Карпош, во кој животот го загубија мајка и нејзината малолетна ќерка. Тој реагираше на прес-конференцијата на Форумот на жени на СДСМ, одржана во пресрет на Меѓународен ден на жената, оценувајќи дека трагедијата била искористена за дневнополитички напади.
Според него, никој нема право човечката болка и трагедија на едно семејство да ги користи за политички цели, особено во период кога, како што рече, општеството треба да говори за достоинството, безбедноста и почитта кон жените.
На крајот, Мицкоски изјави дека политичката ситуација во земјата се одвива во сложени и неизвесни времиња, исполнети со бројни предизвици. Тој им се заблагодари на граѓаните за поддршката и за, како што рече, одбивањето на обидите за создавање политичка паника во јавноста.
МОЖЕБИ ЌЕ ВЕ ИНТЕРЕСИРА:
