Американскиот претседател Доналд Трамп најави дека САД ќе испратат дополнителни 5.000 војници во Полска, само една недела откако Пентагон го откажа претходно планираното распоредување на 4.000 војници во оваа земја.
Трамп истакна дека одлуката е донесена врз основа на, како што наведе, добрите односи со новоизбраниот полски претседател Карол Навроцки, кого претходно јавно го поддржал.
„Врз основа на успешниот избор на сегашниот претседател на Полска, Карол Навроцки, и нашиот однос со него, со задоволство објавувам дека САД ќе испратат дополнителни 5.000 војници во Полска“, напиша Трамп на својата социјална мрежа.
Во последниот период, Белата куќа сигнализираше можност за намалување на американското воено присуство во Европа, во рамки на политиката „Америка на прво место“. Во тој контекст, беше најавено и повлекување на околу 5.000 војници од Германија, по несогласувањата меѓу Трамп и канцеларот Фридрих Мерц околу воените прашања поврзани со Иран.
Во меѓувреме, министрите за надворешни работи на земјите-членки на НАТО денеска се состануваат во Шведска, на состанок на кој ќе присуствува и американскиот државен секретар Марко Рубио.
Пред заминувањето од Вашингтон, Рубио изјави дека Трамп е разочаран од одредени членки на Алијансата кои не дозволиле користење на нивните воени бази за американските операции поврзани со Иран.
Тој посочи и дека некои земји, како Шпанија, не дозволуваат користење на бази од страна на САД, поставувајќи прашање за нивната улога во НАТО, иако додаде дека другите членки дале значајна поддршка.
МОЖЕБИ ЌЕ ВЕ ИНТЕРЕСИРА:
