Удобноста за време на летот е желба на секој патник, но кај нискобуџетните авиокомпании изборот на добро седиште често изгледа како вистински предизвик. Сепак, аргентинската стјуардеса Барби Бак откри неколку трикови кои можат да помогнат патувањето да биде значително попријатно.
Таа објаснува дека авиокомпаниите најчесто им доделуваат помалку атрактивни седишта на патниците кои не плаќаат дополнително за избор на место. Вообичаено станува збор за средни седишта, места во последните редови или позиции без прозорец.
Според неа, со мала доплата може да се обезбеди многу поголема удобност.
„На лет од четири и пол часа доплатив само 11 евра и добив седиште каде што од едната страна немав никого, што го направи патувањето многу поудобно“, вели стјуардесата.
Таа избрала место во 27. ред од десната страна на авионот, каде наместо три има само две седишта, што овозможува повеќе простор и поголема удобност за патниците.
Барби Бак предупредува дека последниот ред е меѓу најнепосакуваните места во авионот, бидејќи таму најсилно се чувствуваат турбуленциите.
Средното седиште, пак, го опишува како најнеудобна опција поради недостатокот на личен простор и близината на двајца непознати патници.
Ниту седиштето до ходникот не е секогаш идеално, особено за оние што сакаат да спијат за време на летот, бидејќи често се вознемирувани од патници кои поминуваат и од количките со храна и пијалаци.
Од друга страна, седиштата покрај излезите за итни случаи нудат повеќе простор за нозете, но носат дополнителни обврски во случај на евакуација и знаат да бидат постудени поради близината до вратите.
Првиот ред зад преградниот ѕид исто така обезбедува повеќе простор за нозете, но патниците таму не можат да го чуваат рачниот багаж под седиштето и мора да го сместат во горните прегради.
МОЖЕБИ ЌЕ ВЕ ИНТЕРЕСИРА:
