Социјалдемократскиот сојуз на Македонија на 32. програмски конгрес ја усвои новата идеолошка платформа „Твоја држава, твоја шанса“, со која партијата ги дефинира идните политички насоки.
Во своето обраќање, претседателот на СДСМ Венко Филипче истакна дека платформата ја потврдува посветеноста на социјалдемократските вредности – правда наместо привилегии, солидарност и подобрување на животниот стандард на граѓаните.
Тој посебно се осврна на евроинтеграциите, наведувајќи дека проширувањето на Европската Унија повторно добива политички моментум, кој, според него, не смее да се пропушти по Самитот на ЕУ во Тиват.
Филипче ги наведе и клучните приоритети на партијата во наредниот период, нагласувајќи дека СДСМ мора да врши силен и континуиран притисок врз власта во три насоки: јасен државен план за отворање на преговарачките кластери и поглавја, понуда на социјалдемократска економска и институционална алтернатива и мобилизација на пошироката прогресивна јавност, вклучувајќи синдикати, граѓански сектор, професионалци и млади.
Во својот говор, тој ја критикуваше актуелната власт дека со нејзиното владеење демократијата се уназадува, а животните трошоци растат, при што порача дека земјата не смее да остане заложник на политичка нерешителност.
На конгресот присуствуваа и гости од сестрински партии од регионот, кои исто така се обратија пред делегатите.
МОЖЕБИ ЌЕ ВЕ ИНТЕРЕСИРА:
