Владата подготвува потрошувачко портфолио кое треба да биде усогласено со „ЕВН Хоум“ и државната компанија ЕСМ, со цел да се обезбеди пониска цена на електричната енергија за граѓаните. Премиерот Христијан Мицкоски најави дека заеднички состанок со компаниите ќе се одржи оваа или следната недела.
Според него, подготовките се во завршна фаза за на крајот на годината да биде распишан соодветен оглас, а веќе од следната година граѓаните би можеле да добијат поевтина струја.
„Целта е преку користење на обновливите извори на енергија, особено сончевата енергија, да се обезбеди просечна цена на електричната енергија која би била од пет до десет проценти пониска од сегашната“, изјави Мицкоски.
Тој оцени дека таков потег би бил редок пример во Европа и изрази умерен оптимизам дека намалувањето на цената ќе стане реалност.
Премиерот посочи и дека Владата има амбиција до крајот на годината Македонија да стане нето-извозник на електрична енергија. Според неговите очекувања, државната компанија ЕСМ ќе ја заврши првата половина од годината со позитивен финансиски резултат, по загубите наследени од претходниот период.
Во однос на инвестициите во обновливи извори на енергија, Мицкоски истакна дека голем дел од проектите се реализирани, но најави законски измени со кои во иднина нема да се дозволува изградба на вакви капацитети на најквалитетното земјоделско земјиште.
Тој најави и напредок во изградбата на голем ветерен парк на подрачјето на Штип, Карбинци и Радовиш, инвестиција вредна речиси половина милијарда долари. Паралелно се разгледува можност за уште еден сличен проект во североисточниот дел на земјата.
Мицкоски информираше и дека состојбата со акумулациите е значително подобрена. Додека во 2024 година нивото на исполнетост било околу седум проценти, сега достигнува околу 80 проценти, што овозможува непречено снабдување со вода за наводнување и создава услови за успешна земјоделска сезона.
МОЖЕБИ ЌЕ ВЕ ИНТЕРЕСИРА:
