Македонскиот репрезентативец Дарко Додев кариерата ќе ја продолжи во Казахстан, откако постигна договор со екипата на Алтаи. Напаѓачот ќе стави потпис на договор со важност од една и пол година, а казахстанскиот клуб успеа да ја добие трката со неколку заинтересирани тимови кои покажуваа интерес за неговите услуги.
Додев зад себе има одлична сезона во дресот на Силекс, каде што се наметна како еден од најдобрите напаѓачи во Првата македонска фудбалска лига. Неговите добри настапи и голови не останаа незабележани, па токму тие му овозможија нов интернационален ангажман.
Добрата форма му донесе и повик во македонската репрезентација од селекторот Гоце Седлоски. Додев беше дел од националниот тим за пријателските натпревари против Босна и Херцеговина и Турција во рамки на јунскиот репрезентативен циклус.
За Додев ова нема да биде прво искуство во странство. Во минатото настапуваше за албанска Влазнија, а во македонскиот шампионат го носеше дресот на Металург, Брегалница, Тиквеш, Шкупи и Силекс.
Со преселбата во Алтаи, македонскиот напаѓач ќе добие нов предизвик во кариерата и можност да се докажува на казахстанската фудбалска сцена.
МОЖЕБИ ЌЕ ВЕ ИНТЕРЕСИРА:
