На територијата на Македонија денеска до 18 часот биле регистрирани вкупно 14 пожари на отворен простор, информира Центарот за управување со кризи (ЦУК). Од нив, пет пожари сѐ уште се активни, два се ставени под контрола, а седум се целосно изгаснати.
Според информациите од ЦУК, активни пожари има во општините Илинден, Босилово, Чашка, Кавадарци и Штип. Во селото Мршевци во општина Илинден гори сува трева, во Секирник кај Босилово е зафатена депонија, додека кај селото Војница во општина Чашка пожарот зафатил нискостеблеста деградирана шума и сува трева. Активни пожари се бележат и кај селото Шивец во општина Кавадарци, како и кај селото Долани во штипскиот регион.
Под контрола се ставени два пожари – кај градската депонија во Демир Хисар и во селото Железница во општина Кратово, каде што исто така горела депонија.
Во меѓувреме, целосно се изгаснати седум пожари на различни локации низ државата. Меѓу нив се пожарите кај Католичките гробишта во Битола, кај селото Мало Коњари и во близина на средното училиште „Орде Чопела“ во Прилеп, како и неколку пожари на подрачјето на Гостивар и Теарце.
Надлежните служби и понатаму ја следат состојбата на терен и преземаат активности за локализирање и целосно гаснење на преостанатите активни пожари.
МОЖЕБИ ЌЕ ВЕ ИНТЕРЕСИРА:
