Националниот одбор за безбедност во транспортот на САД (NTSB) ќе ја предводи истрагата за сериозниот инцидент со авионот „Боинг 737-800“ на „Рајанер“ (Malta Air), кој се случи во воздушниот простор над Северна Македонија.
Од Комитетот за истраги на воздухопловни несреќи и сериозни инциденти (КИНСИВ) за МИА потврдија дека, согласно Анекс 13 на Меѓународната организација за цивилно воздухопловство (ICAO), било побарано истрагата да му биде делегирана на американскиот NTSB.
Претседателот на КИНСИВ, Марјан Прпоски, изјави дека во истражниот тим ќе учествуваат и македонски експерти.
„Во истрагата предводена од NTSB ќе учествуваат и претставници на КИНСИВ“, изјави Прпоски.
Тој посочи дека веднаш по добивањето на информацијата за инцидентот, КИНСИВ ги известил надлежните меѓународни институции, меѓу кои Француското биро за истраги и анализи на безбедноста на цивилното воздухопловство (BEA), Грчката агенција за истрага на воздухопловни несреќи, NTSB и ICAO.
Според авиокомпанијата „Рајанер“, авионот кој летал на релација Солун – Меминген бил принуден да се врати на аеродромот во Солун кратко по полетувањето, откако за време на летот дошло до сериозен инцидент при кој се откачил прозорец покрај едно од патничките седишта.
При инцидентот полесно бил повреден еден патник, кој по безбедното слетување добил медицинска помош. Патниците биле вратени во терминалната зграда, а авиокомпанијата обезбедила заменски авион, со кој тие подоцна го продолжиле патувањето кон Меминген.
Истрагата треба да утврди што го предизвикало оштетувањето на авионот и дали станува збор за технички дефект, структурен проблем или друг фактор.
МОЖЕБИ ЌЕ ВЕ ИНТЕРЕСИРА:
