Судењето на поранешниот венецуелски претседател Николас Мадуро по обвиненија поврзани со трговија со дрога е закажано да започне на 1 јуни 2027 година пред федералниот суд во Њујорк, беше соопштено по одржаното прелиминарно рочиште во Менхетен.
Шеесет и тригодишниот Мадуро, кој беше уапсен во Каракас на 3 јануари и префрлен во затвор во Бруклин, се соочува со четири обвиненија, меѓу кои и за наркотероризам. Неговата сопруга Силија Флорес, која има 69 години, е обвинета по три точки. И двајцата ги отфрлаат сите обвиненија.
Во писмо доставено до судијата Алвин Хелерштајн, американскиот државен обвинител Џеј Клејтон наведе дека обвинителството и одбраната заеднички побарале судскиот процес да започне во јуни 2027 година.
Одложувањето следува откако американските власти одобрија Венецуела да ги покрива трошоците за правната одбрана на обвинетите, иако тоа претходно беше блокирано поради санкциите што САД ги имаат воведено кон земјата.
При своето прво појавување пред судот во Њујорк, непосредно по апсењето, Мадуро се претстави како „воен заробеник“, тврдејќи дека бил приведен во американска воена операција во која учествувале воздушни и копнени сили.
Покрај кривичната постапка, против Мадуро е поднесена и граѓанска тужба од семејствата на петмина млади Венецуелци, кои го обвинуваат дека наредил нивни егзекуции како дел од, како што наведуваат, поширока кампања на државно насилство.
По неговото соборување од власт, функцијата привремен претседател ја презеде Делси Родригез, која ја води земјата во период на политичка неизвесност и силен меѓународен притисок.
МОЖЕБИ ЌЕ ВЕ ИНТЕРЕСИРА:
