Македонскиот ракометен суперлигаш Алкалоид официјално ги претстави трите нови засилувања со кои ќе го засили ростерот за претстојната сезона. Нови членови на тимот од Автокоманда се словенечките репрезентативци Матиц Сухолежник и Нејц Цехте, како и искусниот црногорски ракометар Вуко Борозан.
Триесет и едногодишниот Матиц Сухолежник настапува на позицијата пивот и во Алкалоид пристигнува од словенечкиот РД Слован. Во својата богата кариера го носеше дресот и на Целје, француските Данкерк и Саран, португалска Бенфика, како и хрватскиот шампион Загреб.
Нејц Цехте, кој има 33 години и игра на позицијата десен бек, доаѓа по сезоната мината во германскиот Фуксе Берлин, финалист во Лигата на шампионите. Претходно настапуваше за Кршко, Горење Велење, германски Хановер, дански ГОГ, како и за македонскиот Еурофарм Пелистер.
Ново име во составот е и црногорскиот лев бек Вуко Борозан. Триесет и двегодишниот ракометар зад себе има богато меѓународно искуство, настапувајќи за клубови од Европа, Блискиот Исток и Македонија.
Воедно, Алкалоид ги започна и подготовките за новата сезона. Првата фаза ќе се реализира во Скопје и ќе биде посветена на физичката и техничката подготовка на тимот. Од 3 август ракометарите ќе заминат на подготовки во Маврово, а завршниот дел ќе биде исполнет со контролни натпревари и темпирање на формата пред почетокот на сезоната.
МОЖЕБИ ЌЕ ВЕ ИНТЕРЕСИРА:
