Повеќе од 710.000 луѓе се евакуирани во јужната кинеска покраина Гуангдонг поради ударот на моќниот тајфун Хонгси, познат и под меѓународното име Ноул, соопштија кинеските власти.
Најголем број евакуирани има во градовите Хуиџоу, каде се раселени околу 205.000 жители, и Шанвеј со 192.000 евакуирани. Претходно, покраинскиот штаб за контрола на поплави и суша информираше дека од ризичните подрачја биле евакуирани уште околу 340.000 лица.
Тајфунот Ноул, кој носеше ветрови со брзина до 45 метри во секунда, го погоди крајбрежјето на Гуангдонг во раните утрински часови на 26 јули. По навлегувањето на копното, бурата продолжила да се движи кон север, постепено губејќи од својата сила.
Метеоролозите предупредуваат дека обилни врнежи од дожд ќе ги зафатат и покраините Џијангси и Хунан, каде постои опасност од поплави и свлечишта.
Ноул е дванаесеттиот тајфун во Кина оваа година. На копно излегол во близина на градот Пингхај, во округот Хуидонг, во состав на градот Хуиџоу, околу 3:50 часот по локално време.
Поради сериозноста на ситуацијата, властите во Гуангдонг прогласија највисоко ниво на вонредна состојба. Во погодените подрачја се распоредени илјадници спасувачи и технички екипи за итни интервенции.
Покраинската администрација за комуникации ангажирала 2.178 тимови со повеќе од 7.000 лица, 47 специјализирани возила, 461 сателитски телефон и над 1.700 километри резервен оптички кабел за брза санација на евентуалните оштетувања.
Дополнително, Одделот за транспорт испратил 14 сообраќајни тимови и 134 екипи за итни интервенции со вкупно 3.223 лица, кои работат на обезбедување на патиштата и нормализирање на сообраќајот.
МОЖЕБИ ЌЕ ВЕ ИНТЕРЕСИРА:
