Украински беспилотни летала во текот на ноќта извршија напади врз руските региони Белгород и Ростов, при што загинаа две лица, а најмалку 17 се повредени, соопштија локалните руски власти.
Според Оперативниот штаб на Белгородската област, во нападот врз градот Белгород повредени се 12 лица. Во нападот се запалила станбена зграда, изгореле 15 паркирани автомобили, делумно е уништена една куќа, а оштетени се и повеќе станбени објекти.
Белгородската област се наоѓа долж границата со Украина, а самиот град Белгород е оддалечен околу 27 километри од украинската граница.
Неколку часа подоцна експлозии одекнале и во Ростов на Дон, каде што, според градоначалникот Александар Скриабин, градот бил цел на украински напад при кој била оштетена станбена зграда.
Гувернерот на Ростовската област, Јуриј Сљусар, соопшти дека во нападот загинал брачен пар, додека уште пет лица се повредени. Две лица се во тешка состојба, меѓу кои и еден тинејџер.
Според локалните власти, нападот предизвикал пожари во складишта и неколку куќи, а оштетени се и повеќе станбени згради, како и објект со социјална намена.
Експлозии биле пријавени и во крајбрежниот град Таганрог, на брегот на Азовското Море.
Воените информации засега не можат независно да бидат потврдени, а украинските власти до моментот на објавување не се огласија во врска со нападите.
МОЖЕБИ ЌЕ ВЕ ИНТЕРЕСИРА:
