Македонија од „заробена држава“ (што беше порано од 2006 до 2016 година) сега е премината во „понижена држава“, истакна претседателот на МАНУ академик Љупчо Коцарев во интервју за ТВ Алфа.
-Периодот на владеење од 2017 година до денес најдобро се карактеризира со синтагмата „понижена држава“, дури може да се искористи терминот „демакедонизација на Македонија“, изјави претседателот на МАНУ.
Тој воедно спомена дека се извршени предавства кон македонскиот народ.
-Со Спогодбата од Преспа и Договорот за добрососедство со Бугарија, ние во името на надежта за ЕУ интеграција, се откажавме од Македонците во Бугарија и во Грција и од одбрана на нивните права, тоа е застрашувачко, понижувачко, нечовечно, апсурдно, бесмислено – немам зборови со кои можам да го опишам тој чин. Како се чувствуваат Македонците во Егеј и во Пирин, нивните потомци во Македонија и во светот, по фактот дека македонската држава ги избриша нив? Зар тоа не е предавство? Што мислите вие, праша Коцарев.
Во делот за предавствата тој дури беше и поконкретен кој тоа го сторил.
-Дали се сеќавате на зборовите: „Додека дишам, додека го дишам овој македонски воздух, додека ме држи памет дека мојот дедо, мојот татко сите мои предци, јас мојот син и ќерка сме Македонци родени овде во Македонија, тоа не може да се случи. И не само тоа, верувам дека не постои роден човек подготвен да излезе пред парламентот и да бара промена на Устав заради промена на уставното име“? Тие зборови искажани од државник останаа во меморијата како надеж за достоинствена иднина, но тоа што се случи потоа, промената на Уставот, промената на уставното име, зар не е предавство на татковината, предавство на пријателите, па дури и предавство на Бога и на Исус, потенцира академик Коцарев.
Инаку, во подолгото интервју со новинарот Љупчо Цветановски во емисијата „Што не е јасно“, академик Коцарев посебно нагласи дека не треба да се заборави дека Македонија е мултиетничка општество, а не двоетничка општество и дека македонскиот јазик треба да биде интегративен во државата. Тој посочи и дека постојат решенија за излез од повеќедецениската криза во која се наоѓа државата и дека има решенија за просперитетна и достоинствена Македонија, но за тоа треба консензус меѓу интелектуалците, професорите, граѓаните на Македонија, оти опструкции во справување со кризата и спречување на дивеењето на политичките елити, ќе прават токму дел од владејачките и партиските врхушки.
МОЖЕБИ ЌЕ ВЕ ИНТЕРЕСИРА:
