Полицијата вчера уапси 10 лица и заплени се околу 40 килограми марихуана со вредност над 200.000 евра. Со ова, соопштија денеска од МВР, е сузбиена меѓународна криминална група во која покрај наши државјани, учествувале и албански и косовски државјани, кои биле инволвирани во недозволена трговија и продажба на наркотични дроги, така што организирале транспорт на марихуана од Албанија преку Косово во нашата држава, со цел понатамошен транспорт за Турција.
Во текот на денешниот ден од страна на СВР Скопје ќе биде поднесена кривична пријава до Основното јавно обвинителство за гонење на организиран криминал и корупција против 10 лица.
– По преземени мерки и активности, во вечерните часови, на локалниот пат за село Сопиште од страна на полициските службеници биле запрени две патнички возила, и тоа „рено флуенс“, управувано од С.Ф.(36) и „фолксваген венто“, со скопски регистарски ознаки, управувано од Б.Ф.(30), двајцата од село Никиштане. Првото возило имало задача да биде „чистач“, односно да известува за присуство на полициски патроли, а при извршениот преглед во багажникот од второто возило била пронајдена вреќа во која биле спакувани 27 пакувања со марихуана, појаснуваат во соопштението од МВР.
Истовремено, на крстосницата кај трговски центар на подрачјето на Бит Пазар, од страна на полициски службеници од Интервентна полиција биле лишени од слобода М.Л.(49) од Ѓирокастро, Р.Албанија, Љ.Н.(59) од Скопје и И.Е.(41) од Тетово, кои се превезувале со патничко возило „пунто“, а координирано, во населбата Ѓорче Петров, бил лишен од слобода А.П.(57) од село Грчец.
Од страна на полициски службеници од оперативен тим Потраги заедно со Единицата за брзо распоредување биле извршени претреси на две локации во село Патишка Река. Притоа, од слобода биле лишени две лица, и тоа М.А.(19) од с.Патишка Река и К.К.(31) од Скопје.
За М.А., се наведува во соопштението, биле распишани три Централни потерници, по три судски наредби, веќе осуден на две години казна затвор и дополнителна мерка притвор, додека К.К. се барала по Централна потерница и судска наредба со определена мерка притвор, а при претресите биле пронајдени уште 26 пакувања марихуана.
Претреси биле извршени и на повеќе локации во Скопје, и тоа во село Никиштани, кај С.Ф.(36), при што биле пронајдени машини за копање на биткоини, со кои се вршела кражба на електрична енергија, како и на подрачјата на Карпош и на Бит Пазар, при што биле пронајдени предмети поврзани со кривични дела.
На излез на Граничен премин Долно Блаце, од страна на гранична полиција при Регионален центар Север бил лишен од слобода и косовскиот државјанин Ф.Т.(32), при обид да побегне од државата.
МОЖЕБИ ЌЕ ВЕ ИНТЕРЕСИРА:
