Искусниот стопер Егзон Белица повторно се врати во Работнички. Клубот денеска официјално соопшти дека е постигнат договор со 35-годишниот дефанзивец, кој веќе го одработи и својот прв тренинг со тимот.
Стружанецот не е непознато име за „романтичарите“, откако настапуваше за Работнички во сезоните 2010/2011, 2023/2024 и 2024/2025. Летово беше дел од масовното заминување од клубот, иако беше еден од клучните играчи во екипата што го освои третото место и избори настап во квалификациите за Конференциската лига.
Минатата сезона Белица одигра 30 натпревари, постигна два гола и заработи шест жолти картони. Под негово водство одбраната не претрпе пораз во првите 13 кола, а на полусезона единствениот пораз беше на гостувањето кај Струга. Сезоната ја заврши со вкупно седум порази, од кои на последните два не настапи.
По заминувањето од Работнички, Белица се пресели во Шкендија, каде што имаше споредна улога и запиша само шест настапи – пет во Првата лига и еден во Купот, без минути во европските натпревари.
Работнички, пак, ја заврши есенската полусезона со само седум освоени бодови и се наоѓа на претпоследното место на табелата, сериозно загрозен од испаѓање во Втората лига, каде што не настапувал од сезоната 1997/1998. За разлика од минатата година, кога на полусезона имаше само еден пораз, оваа сезона тимот веќе запиша дури 11.
Во зимскиот преоден рок клубот се засили со неколку нови имиња, но се раздели и со поголем број фудбалери од составот што не ги исполни очекувањата, во обид да се стабилизира ситуацијата и да се избори опстанок во елитата.
