Претседателот на Владата Христијан Мицкоски денеска ќе престојува во работна посета на компанијата „Макпрогрес“ во Виница, по повод отворањето на новата фабрика за кондиторски производи во рамки на брендот „Винчини“.
Според владината прес-служба, премиерот ќе одржи работен состанок со менаџерскиот тим на компанијата, на кој ќе се разговара за економските состојби, извозните резултати, инвестициските активности и идните развојни планови.
По состанокот е предвидена свечена церемонија за отворање на новата инвестиција, при што Мицкоски ќе присуствува на сечење на лента и ќе ги разгледа новите производствени линии. Потоа е најавена и изјава за медиумите.
Во настанот ќе учествуваат и претставници на Стопанската комора, како и нејзиниот претседател Бранко Азески, градоначалникот на Виница Митко Костадиновски и генералниот директор на „Винчини“, Глигор Цветанов.
Новата фабрика, вредна 8,5 милиони евра, е реализирана за шест месеци и располага со две современи производни линии за вафли и кондиторски производи. Производите се наменети за домашниот пазар, како и за повеќе од 60 странски пазари.
Со стартот на производството се отворени 40 нови работни места, а во следната година се планира отворање на дополнителни 40. Со ова се очекува зголемување на производствените капацитети за околу 30 проценти и засилување на извозот на компанијата.
МОЖЕБИ ЌЕ ВЕ ИНТЕРЕСИРА:
