Премиерот Христијан Мицкоски од денеска престојува во работна посета на Брисел, каде што утре ќе учествува на Самитот ЕУ – Западен Балкан.
Во рамки на посетата, според најавите, премиерот Мицкоски и членовите на владината делегација вечерва ќе присуствуваат на настанот со наслов „Здравица за добрите соседи: Еве колку се добри Западните Балканци…“. Настанот се одржува под покровителство на еврокомесарката за проширување Марта Кос, а го организираат амбасадорите на земјите од Западниот Балкан во Брисел.
Како што се наведува во официјалната најава, станува збор за уникатен настан посветен на чествување на културното богатство, разновидноста и европската перспектива на Западниот Балкан, со посебен акцент на една од најсимболичните регионални традиции – уметноста на производство на вино.
„Обединувањето на Европа може да се темели единствено на споделени вредности, поттикнати од поединци инспирирани од заедничка култура и историја. Овој симболичен собир има за цел да ги одбележи овие врски во средина што поттикнува дијалог, пријателство и меѓусебно разбирање“, се истакнува во најавата на настанот.
Присутните ќе имаат можност да дегустираат препознатливи вина од секоја од земјите од Западниот Балкан, да се запознаат со нивните производители и да ја доживеат разновидноста на регионот во неформална и пријателска атмосфера.
МОЖЕБИ ЌЕ ВЕ ИНТЕРЕСИРА:
