Претседателката Гордана Сиљановска-Давкова оценува дека директните средби меѓу лидерите на политичките партии се покорисни од разговори преку посредници. Според неа, по неодамнешната лидерска средба сите учесници биле релаксирани и уверени дека следниот чекор ќе биде уште подобар, но смета дека на средбата требало да присуствува и лидерот на опозициската СДСМ, Венко Филипче.
Во гостување на ТВ Сител, Сиљановска-Давкова истакна дека е време лидерите да седнат и заеднички да креираат решенија за измените на Изборниот законик, но тоа да се прави на почетокот на мандатот, а не на неговиот крај, и не само околу прашањето за изборните единици.
Таа се осврна и на темата за техничката влада што функционира пред избори, оценувајќи дека станува збор за препартиска структура без уставен основ. Според неа, не е добро во моментов да се оди на предвремени парламентарни избори, бидејќи државата има сериозни започнати процеси кои треба да се довршат.
Сиљановска-Давкова нагласи дека лидерските средби можат да ги зајакнат лидерите, но истовремено да ги ослабнат институциите. Сепак, во поделено општество како македонското и во рамки на консоцијативната демократија, ваквите средби понекогаш се неопходни и покорисни од индиректна комуникација.
Неучеството на Филипче на средбата, според претседателката, претставува негова грешка, бидејќи поканата била испратена. Таа додаде дека е подобро прво да се слушнат аргументите на сите страни, па потоа да се излегува со јавни изјави.
Во однос на техничката влада, Сиљановска-Давкова истакна дека во Уставот не постои поим за преодна или техничка влада и дека моделот што се применува кај нас е специфичен и проблематичен. Како спорни ги наведе дополнителните министри и заменици министри со право на вето, како и улогата на Државната изборна комисија во финансиските спорови.
Таа потсети дека укинувањето на техничката влада било тема на критика од сите партии, вклучително и од СДСМ, уште во минатото.
Во делот за Изборниот законик, претседателката посочи дека клучни прашања се начинот на претворање на гласовите во мандати, изборниот модел (една изборна единица или повеќе), еднаквоста на гласот, како и условите за независни листи. Според неа, потребно е да се разгледаат и прашањата за финансирање, политичко рекламирање и препораките на ОБСЕ и Венецијанската комисија, со цел да се создаде подобра основа за идните изборни процеси.
МОЖЕБИ ЌЕ ВЕ ИНТЕРЕСИРА:
