Со учество на неколку стотини маскирани од земјава и странство, во Прилеп денеска по 25-ти пат се одржа карневалот „Прочка“, еден од најпрепознатливите настани посветени на празникот на простувањето.
Централното дефиле низ градот традиционално го предводеа прилепските мечкари – заштитен симбол на карневалот и препознаена нематеријална културна вредност. Со обредниот ритуал на бркање на злите духови, тие ја потврдија вековната традиција, нагласувајќи дека таа ќе продолжи да се негува и преку помладите генерации.
„Навистина е голема традицијата и цврсто се одржува. Радосен сум што карневалот го вративме на меѓународната сцена. Ни пристигнаа учесници од повеќе градови од Македонија, но и од Србија и Бугарија“, изјави Ванчо Ѓеорѓиев, претседател на здружението „Прилепски мечкари“, организатор на карневалот.
На манифестацијата присуствуваше и претседателот на европската асоцијација на карневалските градови, Ларс Алгел, кој по десетина години повторно го посети Прилеп.
„Навистина сум среќен што направивте убав старт на карневалот и имам посебни чувства што сум тука и уживам во карневалот на маските“, порача Алгел.
Градоначалникот Дејан Проданоски истакна дека се враќа сјајот на карневалот и на прославата на Прочка во Прилеп, празник што ја симболизира моќта на простувањето.
„Маските се одраз на сето она што се случувало во текот на годината – да се избрише лошото, да се остави простор за доброто. И да се простува. Прилепскиот карневал го враќа сјајот на меѓународната сцена и ќе се потрудиме уште повеќе да го збогатуваме“, рече Проданоски.
Жири-комисија ќе ги прогласи најдобрите маски од централното дефиле, како и од детскиот карневал.
Организаторите ги поканија учесниците утре, на Чист понеделник, на традиционален посен ручек – посен грав во манастирот Свети Ѓорѓија кај Прилеп, со што симболично ќе започнат Велигденските пости.
МОЖЕБИ ЌЕ ВЕ ИНТЕРЕСИРА:
