Скопје е пренатрупан со бетон. Да се направат похумани детални урбанистички планови кои ќе бидат прифатливи за потребните на граѓаните, а не бетонизација со стотина згради предвидена со досегашните планови е намерата на иницијативите во општините Кисела Вода и Центар.
Градоначалникот на општина Кисела Вода, Орце Ѓорѓиевски, вчера соопшти дека по барања на граѓаните го стопирал планот за изградба на 99 згради во Расадник. Тие се предвидени со ДУП-от кој беше во процедура кај претходното општинско раководство но не беше изгласан од Советот поради реакциите на граѓаните. Тој најави дека Општината ќе објави меѓународен конкурс на кој архитекти ќе може да достават предлог идејни решенија.
– Стопиран е и планот за Расадник. Во истиот Комисијата констатира дека има 99 нови згради, па согласно барањата на граѓаните, заклучно со февруари, ќе биде објавен меѓународен конкурс за изработка на идејно решение за ДУП Расадник, по што најдоброто решение ќе го изберат граѓаните на Расадник, рече Ѓорѓиевски.
Оваа општина направила ревизија на 34 плана меѓу кои и планот за Црниче каде во зелениот појас биле предвидени изградба на станбени куќи, планот за Припор каде биле предвидени станбени згради, а ќе се разгледува и планот за населбата Пржино.
Од друга страна, партијата „Левица“ вчера повторно побара одржување на граѓански референдум во општина Центар против градежните дејствија на парцелите спроти „Холидеј Ин“. Тие поднесоа две точки на дневниот ред на седница на општинскиот Совет. Левица бара распишување на дополнителен референдум на кој граѓаните ќе се изјаснат дали сакаат суспензија на ДУП-от во кој што се наоѓаат предвидените висококатници. Со втората точка бараат истрага од службите на општина Центар за законитоста на отуѓувањето на градежното земјиште.
-Очекуваме без никаков проблем Советот да ги усвои овие точки и според нив да донесе одлуки со кои ќе распише референдум за спорните логации, согласно тоа службите на општината ќе преземат активности од нивна надлежност за отворање на истрага и активности во правец на поднесување на поднесување на претставки за до надлежните институции за отворање на истрага, најавија од Левица.
На оваа локација отпочнатата зграда ја гради МГ Фешн заедно со МПЦ која е сопственик на земјиштето, а следна на распоред е станбена зграда од 22 ката, по нејзе ќе следи деловен трговски центар од 16 ката.
Ќе се воведе ли малку ред во пренагласеното бетонизирање на Скопје?
МОЖЕБИ ЌЕ ВЕ ИНТЕРЕСИРА:
