Уставниот суд на денешната седница ги отфрли сите иницијативи со кои се оспоруваше уставноста на измените во Законот за прекршоци поврзани со системот „Безбеден град“.
Судиите оценија дека законските измени не се спротивни на Уставот и ги отфрлија иницијативите поднесени од двете крила на Алијансата за Албанците, предводени од Зијадин Села и Арбен Таравари, како и од студентот Или Пачуку, со кои се бараше поништување на спорните одредби.
Иницијативите се однесуваа на делови од законот поврзани со доставата на известувања, издавањето записник за сторен сообраќаен прекршок со сообраќаен патен налог, како и прифаќањето или неприфаќањето на одговорност за прекршок. Подносителите укажуваа и на тоа дека системот „Безбеден град“ се применува само во Скопје, Куманово и Тетово, а не на целата територија на државата.
Судијката известител Ана Павловска-Данева посочи дека кога станува збор за употребата на албанскиот јазик во пораките и известувањата што ги добиваат граѓаните, нема потреба во секоја поединечна одредба експлицитно да се наведува примената на Законот за употреба на јазиците. Таа нагласи дека во Законот за прекршоци нема одредби што ја оспоруваат употребата на јазиците.
Во однос на забелешките за можност од злоупотреба на личните податоци, Павловска-Данева истакна дека постои Закон за заштита на личните податоци и дека Министерството за внатрешни работи и Агенцијата за заштита на лични податоци дале согласност за заштита на приватноста на граѓаните.
Пред Уставниот суд сè уште е во постапка друг предмет поврзан со системот „Безбеден град“, кој се однесува на одредби од Кривичниот законик, меѓу кои и можноста за одземање на возила.
На истата седница, Уставниот суд одлучи и да ја запре постапката за оценување на уставноста на измените на Законот за платите на судиите од 2024 година, бидејќи тие повеќе не се дел од правниот поредок. Истовремено, по сопствена иницијатива е поведена постапка за оценување на новите измени од февруари годинава.
МОЖЕБИ ЌЕ ВЕ ИНТЕРЕСИРА:
