Македонската женска кошаркарска репрезентација го претрпе третиот пораз во четвртиот натпревар од квалификациите за Евробаскет 2027, откако на гостински терен убедливо беше поразена од Данска со 125-57.
Македонските кошаркарки настапија во значително ослабен состав, без долгогодишниот капитен Анџелика Митрашиновиќ, која ја заврши професионалната кариера, како и без Ивана Кметовска и Матеа Николиќ. Во такви услови, избраничките на селекторот Александар Ашаданов не успеаја да му се спротивстават на расположениот дански состав.
Данска уште во првата четвртина направи предност од 29-21, а до крајот на првото полувреме разликата порасна на високи 56-33. Домаќинките продолжија со доминацијата и во вториот дел од натпреварот, па во последната четвртина влегоа со убедливо водство од 83-45, кое до крајот го претворија во трицифрена победа.
Најефикасни во редовите на Македонија беа Хемпе со 27 поени и Селцова со 10.
По четири одиграни натпревари, македонската репрезентација се наоѓа на последното место во групата Ф со една победа и три порази, со што шансите за пласман во втората квалификациска фаза се сведени на теорија. До крајот на циклусот Македонија ќе ги одигра уште натпреварите против фаворитите Грција и Хрватска.
Следниот натпревар избраничките на селекторот Ашаданов ќе го одиграат в сабота на гостински терен против Грција, додека во последното коло, идниот вторник, во Скопје ќе ја пречекаат селекцијата на Хрватска.
МОЖЕБИ ЌЕ ВЕ ИНТЕРЕСИРА:
