Американскиот претседател Доналд Трамп изјави дека неговата порака до рускиот претседател Владимир Путин е јасна – војната во Украина мора да заврши. Тој го кажа ова по, како што оцени, „добри“ разговори со украинскиот претседател Володимир Зеленски, одржани во Давос во четвртокот.
Американски и украински претставници веќе со недели водат интензивни дипломатски активности во различни престолнини, во време кога Киев е под засилен притисок од администрацијата на Трамп за постигнување мировен исход на речиси четиригодишниот конфликт, и покрај ограничените сигнали дека Москва е подготвена да ги прекине борбите.
Средбата со Зеленски траела околу еден час, а Трамп ја оцени како „добра“, без да навлезе во детали за содржината. Еден ден претходно тој изјави дека можно е договорот да е „разумно близу“.
„Мислам дека средбата со претседателот Зеленски беше добра. Ова е процес што трае“, рече Трамп пред новинарите, додавајќи дека американските пратеници денеска патуваат во Москва за разговори. На прашањето каква порака испраќа до Путин, Трамп одговори: „Војната мора да заврши.“
Зеленски претходно оваа недела најави дека ќе отпатува во Давос само доколку постои можност за потпишување договори за американски безбедносни гаранции и финансирање на повоената обнова на Украина, но по средбата немаше индикации за конкретен напредок.
Двајцата лидери се сретнале лице в лице приближно шест пати откако Трамп минатата година се врати во Белата куќа и ја промени американската политика кон Украина, отворајќи можност за дипломатија со Русија.
МОЖЕБИ ЌЕ ВЕ ИНТЕРЕСИРА:
