Маките на една третина од македонските граѓани кои го немаат во пасошите омилениот збор на власта – „Северна“ не запираат. Оние што се во земјава не смеат да излегуваат преку граница, оние што се во странство, пак, не смеат да влезат оти не знаат на кој начин би можеле да се вратат на своите работни места во други земји.
Листите за закажување на термини за промена на пасош се пак долги и сосема е неизвесно кога оние околу 650.000 граѓани што живеат тука ќе можат да дојдат на ред. А и обрасци за пасоши нема иако тоа морало претходното раководство на МВР да го предвиди и да почара повеќе пасоши од производителот.
Дали се прави доволно за да се надмине овој огромен проблем?
Со вакво темпо и организирање на промената на пасошите се чини хаосот ќе трае уште година – две. Да, се прават „напори“ тој период да се намали со поажурно работење на станиците на МВР, но…
Потребно е решение кое ќе им овозможи патување сега со старите пасоши кои се уште имаат важност. Но, тоа надлежните постојано одбегнуваат да го направат. Новиот министер во МВР Панче Тошковски викендов изјави дека решението е многу едноставно.
-Решението на ова патешествие е едно и е многу лесно. 61 пратеник да се договорат во Собранието да дигнат два прста, односно да стиснат едно копче, со коешто копче ќе го изменат Законот за патни исправи, како што го изменија Законот за безбедност во сообраќај и сите овие маки да ги решат во наредни десет месеци, кажа Тошковски.
Ова не е првпат да се бара изгласување на продолжување на рокот на важењето на старите пасоши. Но, тоа категорично не се прифаќа од СДСМ и ДУИ. Техничкиот премиер Талат Џафери неодамна изјави дека барањата да се продолжи рокот на важењето на старите пасоши по примерот на возачките дозволи се несериозни.
– Несериозен, популистички и исклучиво во партиски интерес е наводниот повик да се поддржи законско решение со коешто би се продолжила важноста на патните исправи, по примерот на решението со возачките дозволи, рече Џафери додавајќи “непочитувањето на меѓународните договори би нанело штета на меѓународниот углед на државата“.
Сепак, од Џафери јавноста не доби аргументирано објаснување зошто ваквото решение е несериозно и неизводливо. Од друга страна, од граничните премини стасуваат информација дека има држави кои не прават проблеми и го дозволуваат влезот на нашите државјани со стари патни исправи. Значи, некој поголем проблем околу употребата на старите пасоши не се случува.
Излегува дека е нужно парламентарното мнозинство брзо да се преиспита и да види што може да се направи околу ова сериозно кршење на човековите права за една третина од македонското население. Власта мора да се организира и да си ги поправи грешките. Има ли подготвени лица за тоа во Владата?
МОЖЕБИ ЌЕ ВЕ ИНТЕРЕСИРА:
