Франција ја започна најголемата воена вежба од крајот на Студената војна, во која учествуваат околу 12.500 војници. Тримесечната операција има цел да ја тестира подготвеноста на европските армии за конфликти со висок интензитет.
Вежбата „Орион 26“, која ќе трае до 30 април, вклучува 25 воени бродови, меѓу кои и носачот на авиони „Шарл де Гол“, 140 авиони, околу 1.200 беспилотни летала и вооружени сили од 24 држави. Меѓу учесниците се и САД, Јапонија, Швајцарија и Мароко.
Сценариото на вежбата е фиктивно и се одвива меѓу две измислени држави — Арнланд и Меркурија. Според него, Меркурија се обидува да го дестабилизира соседот Арнланд за да го спречи неговото приближување кон Европската Унија. Франција во сценариото предводи меѓународна коалиција која треба да се спротивстави на хибридни закани и паравоени активности.
Вежбата започнува со симулирано амфибиско и воздушно слетување во Бретања, каде на 20 и 21 февруари ќе бидат распоредени околу 700 војници и 100 возила во областа Киберон. Од април, командата ќе ја преземе НАТО, со цел да се тестира координацијата меѓу сојузничките армии.
Во маневрите се вклучени три бригади, повеќе од 2.000 тактички возила, 40 хеликоптери, како и способности за сајбер-операции и вселенско војување. Планирани се и симулации на борбени операции, контранапади и преминување на природни пречки, вклучително и реките Сена и Об.
Главната цел на „Орион 26“ е да се провери способноста на Франција да предводи мултинационална воена коалиција, како и функционирањето на комуникациските и логистичките системи во услови на евентуален конфликт со висок интензитет.
МОЖЕБИ ЌЕ ВЕ ИНТЕРЕСИРА:
