Од „Охрид СОС“ истакнуваат дека ваквата постапка претставува упад во урбанистичкото планирање и како што велат, бришење на јавниот интерес со потпис од градоначалник и министер, без учество на јавноста.
Од Граѓанската иницијатива „Охрид СОС“ денеска изразија загриженост околу најавените измени на Правилникот за урбанистичко планирање во Охрид, кои предвидуваат одредени градби да се реализираат само со урбанистички проект, наместо со урбанистички план, промена која, според нив, ја елиминира јавната контрола и ја става животната средина и јавниот интерес во втор план.
Според измените, урбанистички проект вон опфат на урбанистички план ќе може да се користи за изградба на објекти од државно и локално значење, како што се фотоволтаични фарми, мали хидроцентрали и депонии за опасен отпад.
Од здружението забележуваат дека овие проекти ќе се носат на база на просторни планови, без да се помине низ целата процедура на урбанистички план, која вклучува јавна анкета, партиципативно тело и одлучување во Советот на општина.
Од „Охрид СОС“ истакнуваат дека ваквата постапка претставува упад во урбанистичкото планирање и како што велат, бришење на јавниот интерес со потпис од градоначалник и министер, без учество на јавноста.
Тие нагласуваат дека ваквите проекти ќе доведат до експлоатација на земјоделско, шумско и крајбрежно земјиште, претворајќи го во градежно без соодветна процедура и без јавна контрола.
„Охрид СОС“ испратија апел до Министерството за транспорт да ги повлече предложените измени и да ги елиминира можностите за изградба на овие објекти без јавна контрола. Тие нагласуваат дека урбанистичкото планирање треба да се базира на принципите на јавност, инклузивност и партиципативност, а не на економска оправданост за инвеститорот.
Граѓанската иницијатива „Охрид СОС“ повикува на внимателно разгледување на предложените измени и побараа вклучување на јавноста во процесот на урбанистичко планирање. Тие апелираат до надлежните институции „да ја слушнат волјата на заедницата и да преземат одговорност пред историјата и идните генерации“.
МОЖЕБИ ЌЕ ВЕ ИНТЕРЕСИРА:
