На 15 ноември, денес, во Скопје ќе се одржи таканаречениот „Марш за ангелите“ – протестен собир посветен на 63-та млади кои го загубија животот во пожарот што ја зафати дискотеката „Пулс“ во Кочани. Маршот ќе започне во 12:05 часот на плоштадот „Македонија“, од каде што колоната ќе тргне кон Собранието, а завршницата е пред Основниот кривичен суд.

Овој настан, организиран од граѓанските иницијативи „Кој е следен!“ и „16 Март 2025“, е прв од ваков тип во метрополата, по неколкунеделните саботни собири што родителите ги одржуваа во Кочани. Од таму беше испратена пораката што силно одекна низ државата: „Не бараме милост, туку вистина и правда. Болката е наша, но борбата е за сите. Нè треба вашата поддршка“. Родителите очекуваат голем одѕив и велат дека нема да запрат додека не се утврди целосната одговорност за трагедијата која им ги одзеде децата.

Организаторите уште еднаш ги повикаа граѓаните:

Придружете ни се. Секоја подадена рака значи сила, секој присутен има своја тежина. Да бидеме обединети и да покажеме дека болката не нè поразила, а битката за вистинска правда продолжува.