Претседателот на Уставен суд, Дарко Костадиновски, на годишната прес-конференција упати итни апели до Судски совет и до Собрание на Република Северна Македонија што поскоро да предложат и изберат уставен судија, со цел Судот да функционира во целосен состав. Тој повика и на повисоко ниво на уставно-правна култура кај политичарите и реална посветеност кон владеењето на правото.
Костадиновски истакна дека Уставниот суд веќе се соочува со сериозни проблеми поради некомплетниот состав. Од мај досега, има десетина предмети за кои нема донесено одлука, а само на последната седница три предмети останале без потребното мнозинство.
Во однос на предметот за пензиите, тој појасни дека законите се поделени и дека одлуката ќе биде донесена веднаш по изборот на нов судија. Нагласи дека поведувањето постапка не значи автоматска одлука, бидејќи процесот има повеќе фази и исходот не секогаш е укинување или поништување на закон.
Коментирајќи ги забелешките за наводно бавно постапување, Костадиновски истакна дека Судот располага со механизми за исправка на последиците од законите, па суштината не е секогаш во брзината, туку во правниот ефект на одлуките.
Во врска со измените на Кривичниот и Изборниот законик, тој предупреди дека парламентот и владата не ги почитуваат роковите што ги дава Уставниот суд. Според него, периодот на толеранција завршува и Судот се подготвува да воведе построга уставна дисциплина преку нов тип на одлуки.
„Можете да очекувате наредната година многу поинакви одлуки од Уставниот суд“, порача Костадиновски, нагласувајќи дека Судот има обврска да спречи надмоќ на една власт над друга и да ја заштити уставната рамнотежа.
МОЖЕБИ ЌЕ ВЕ ИНТЕРЕСИРА:
