Граѓани од Куманово кои со години работеле за американски компании во Ирак и Авганистан денеска одржаа мирен протест на малиот градски плоштад, барајќи од Управа за јавни приходи да ги ревидира известувањата за плаќање персонален данок на доход од 2020 година наваму. Тие нагласија дека протестот нема политичка или партиска заднина, туку е исклучиво граѓански и најавија користење на сите правни механизми.
Печалбарите посочија дека даночни известувања добиле за период од јуни 2020 година, кога поради пандемијата голем дел од нив воопшто не биле во државата и немало авионски летови. Тие велат дека не се против плаќање даноци, но сметаат дека наплатата е ретроактивна и претставува форма на двојно оданочување, бидејќи даноците, според нив, биле платени во земјата каде што работеле компаниите.
Како проблем го наведоа и фактот што многумина од нив престојувале повеќе од 183 дена годишно надвор од државата, но од Министерство за внатрешни работи не добиваат потврди за тоа, иако располагаат со пасоши, визи и печати. Дополнително реагираат дека рокот од десет дена за доставување документација е нереален, особено за време на празници.
Протестирачите истакнаа дека заработените средства ги вложиле во Македонија – во изградба на куќи и станови, образование на децата и започнување бизниси, нагласувајќи дека станува збор за легално заработени пари. Тие побараа од Министерство за финансии и УЈП да ја стопираат постапката додека компаниите не издадат соодветни потврди, како и МВР да им ги издаде бараните уверенија.
„Не бараме амнестија и не бегаме од обврските, бараме дијалог“, порачаа кумановци, најавувајќи продолжување на постапката по правен пат. Според нив, вакви даночни решенија добиле меѓу три и четири илјади лица, со износи од 200 евра па нагоре, во зависност од позицијата што ја имале.
МОЖЕБИ ЌЕ ВЕ ИНТЕРЕСИРА:
