Белата куќа соопшти дека состанокот меѓу американските официјални претставници и високите претставници на Данска и Гренланд бил продуктивен, но истовремено нагласи дека евентуалното распоредување европски трупи на островот нема да го промени ставот на американскиот претседател Доналд Трамп во однос на таа територија.
Портпаролката на Белата куќа, Каролин Ливит, на прес-конференција изјави дека вчерашните разговори меѓу министрите за надворешни работи на Данска и Гренланд, Ларс Локе Расмусен и Вивијан Моцфелд, со потпретседателот на САД Џеј Ди Венс и државниот секретар Марко Рубио, биле „продуктивни“, пренесува Скај Њуз.
Според Ливит, страните се договориле да формираат работна група која ќе продолжи со технички разговори поврзани со можната „аквизиција на Гренланд“. Таа појасни дека овие разговори ќе се одржуваат на секои две до три недели.
„Претседателот јасно го истакна својот приоритет – тој сака САД да го добијат Гренланд и смета дека тоа е од клучно значење за националната безбедност“, изјави Ливит, додавајќи дека испраќањето европски трупи на островот нема да влијае врз неговата позиција.
Во меѓувреме, данските и гренландските власти повторно ги предупредија САД да не преземаат чекори кон заземање на островот, нагласувајќи дека очекуваат целосно почитување на нивниот територијален интегритет. Гренланд беше данска колонија до 1953 година, а иако остана дел од Кралството Данска, во 2009 година доби широка автономија и право самостојно да управува со внатрешната политика.
МОЖЕБИ ЌЕ ВЕ ИНТЕРЕСИРА:
